Meghan Markle; a brand thar hminga thawmhnaw hralh khap

Meghan Markle, Duchess of Sussex chu a brand hming a phuah thar, As Ever tih hminga thawmhnaw a zawrhchhuah khap sak a ni. Hei hi Chinese fashion firm-in a hma daih aṭang tawha he hming hi a lo hman tawh vang a ni.

Markle hian a brand hming hmasa, American Riviera Orchard tia a vuah chu tun hnaiah As Ever tiin a thlak a, a attorney chuan US Patent and Trademark Office (USPTO)-ah a brand thar hming hian apron leh thawmhnaw hralh phalna a dil a ni. Mahse USPTO chuan Chinese fast fashion brand, ASEVER nen an hming hi a in ang em avang an dilna hi a lo hnawlsak a ni. Markle hian thawmhnaw lam ni loah chuan As Ever hming hi a hman phalsak a ni thung.