Fashion Fiesta

Puipun nikhua, abik takin ṭhatni bikah te khawthlang ramte tihdan kan entawn nasa ta hle a, an incheina mai piah lamah a hmunhma eng ilo vel pawh kan ngai pawimawh ta hle a ni. Chung zinga a serh zinga a mei ang hiala kan neih tak pangpar hmanga cheimawite kan uar chho ta hle a ni. A hmun hma a timawiin kan ngaih pawimawh ber pakhat, thlalak (photo) en let leh pawh hmuh tinuam >m >mtu anih vang te pawh aniang chu, kan nunah hian pangpar hian nasa takin hmun a chang a tih theih awm e. Hlimna niah induhsakna entir nan kan hmang a, chutiangin chhiat niah kan intawrhpuizia lantir nan kan hmang bawk. A dangdaina leh danglamna ber pakhat pawh hei hi a ni ngei ang. Pangparina kan nun a khawih dan chu a inang lo viau mai thei a, chutiangin hmasang aṭang daih tawh khan mite nunah nasa takin thu a lo sawi daih tawh a ni.

Incheina ṭhang chho zelah dangdai leh danglam inhmuh chhuahsiakna khawvelah hian thil thar hmu­chhuak turin nasa taka kan inel mek lai hian thil awmsa hlui thei lo vawiin thlengin kan uar deuh deuh zel emaw chu aw tih tur khawpa khawvel a zuna uaitirtu pangpar ziarang chanchin hi belchiang dawn teh ang. Puanthan dawr tinah lut la, pangpar zia hrang hrang ṭhuia hak mai theih tur i hmu ṭeuh ngei ang. Chutiangin designer larte leh thawmhnaw siam chhuaktu lian ten pangpar ziarang hmangin thawmhnaw nalh tak tak an siam chhuak chur chur mai a, kan uar chho dawn chauh niin a lang. Pangpar zia tih chuan tu tan mah thil thar a ni lo. Amaherawhchu, khawi lam aṭanga lo irh chhuak nge a ni tih erawh kan ngaihtuah ngai lemin a lang lo. Han chhui vang vang chuan Asia khawmualpui aṭanga siamchhuah ṭan niin a lang. Heng, a bikin Japan, China leh India te hi a sulsutu hmasa ber berte an ni a, han chhui chiang zel ila Japan ramah chuan an lal chhungkuate’n an lalzia lantir nan leh mi pangngai neih ve mai mai theih loh a nih avangin an kawrfual hak ṭhin Kimono an tihah chuan pangpar chi khat, Chrysanthemum (he pangpar hian ni a tlangsan lai ber a an >m avangin lalna, ropuina entir nan an hmang ṭhin) ziarang chu nemkaiin khawvelin a nachang a hriat hma daih aṭang tawhin nemkai dan hrang hrang - Katazome leh E-gasuri hmang tein an lo siam dai tawh a ni.

A ṭhui a ṭhui par chi Shibori Stitch hmang te pawhin pangpar ziarang an lo siam ṭhin. Chutah ṭhenawm ram China-ah ve thung chuan a taha tah te, silk puana ziarang siam, rawng lar leh langsar deuh deuhah te an siamchhuak nasa hle. Abikin heng thil lem pahnih - phoenix leh peony te hi hausakna leh zahawmna lantir nana hman ṭhin a nih avangin an thawmhnaw tam zawkah hmuh theihin an tarlang ṭhin a ni. An sakhuana nena inzawm tak pakhat, Buddhist-in thianghlimna entir nana an hman ṭhin Lotus pangpar pawh ziarang bik rau rauah an uar hle. Heng bakah hian velvet puanah nasa tak leh pui takin carnations (pangpar) lem ṭhui par te pawh an uar hle ṭhin a ni. Kan ram India ngei pawh hi a uar chhuaktu hmasa te zinga mi niin, a tir lamah chuan in chhung bungrua cheimawi nan puanthanah ropui tak tak leh nasa tak takin kut ngei maiin an lo ṭhui par ṭhin a ni.

Europe lam aṭanga sumdawngho rawn kal khan heng par ziarang mawi tak tak hi a dangdai >m avangin anmahni ramah chawk luh dan an ngaihtuah chho ta a, kum 1400-1500 chhoah khan Dutch leh British sumdawng mi hoin man to tak takin an rama zawrh chhawn turin an chawlut chho ṭan ta a, a ṭhui dan leh siam dan an thiam ve miau loh avangin Europe khawmualpuia mi challang leh lal chhungkawho chuan a to em vangte pawh a ni ang, an inneihsiak chho ta a, inel nan an hmang emaw tih mai tur a ni. Hetianga mi challang zawk ten an buaipui tak siah chuan an ram economy pawh nasa taka a khawih danglam tak avangin 1680 aṭang khan lakluh an khap ta hial a, amaherawhchu 1759 a lo nih meuh chuan lakluh an khapna dan chu hlih a lo ni leh ta a ni.

A nihna takah chuan a siam chhuaktu hmasa India, China leh Japan ni tho mah se khawvel hmuha pho chhuaktu tak erawh chu Dutch leh British sumdawngho kan ti lo thei lo. Europe khawmualpuiin rei tak a siamchhuah dan an hriat loh hnuah 1920s chhoah chuan Classic Liberty Print, Label Liberty Company hnuaia mi, London lam chhuak chuan mipui nawlpuiina kan neih zawh ve tur ang chiho hi an lo siam chhuak ta a ni. Italy lamah ve thung chuan Italian ottoman textile manufacturers te hi a siamchhuaktu hmasa niin khawchhak lama embroidery leh print pui deuh deuh ang lo deuhin, mawlmang tak tak ze sin te te, pangpar lem chuanna puanthan chu an lo siam chhuak ta a. Heng aṭang hian puan lama sumdawngho ten khawvel hmun hrang hrangah pu darhin, khawvelin a lo hmelhriat chho ṭan ta a ni.

Hemi bak hi chu sawi belh vak ngai loin kan hre­thiam vek awm e. Hmei­chhe thawmhnaw chauh ni lo, mipa lam thuam Kamis leh T-Shirt-ah te pangpar ziarang hmuh tur a awm chho ta zel a, a la awm zel dawn ni pawhin a lang. I Wardrope-ah khan pakhat tal i lo khai ve dawn nia.

Tluangpuii Hmar
Instructress
Vakiria Institute of Fashion Technology