Mizo music video hmasa ber Joseph Zokunga Band

Mizorama Mizotena music video an lo siam tawh dawn chhui letnaah, music video hmasa ber nia hriat chu Joseph Zokunga Band music video te a ni.

Researcher for Mizoram Photography and Videography, Lalawmpuia Chhangte chuan Mizorama music video siam tawhte chhui letin, a hmuhchhuahah chuan Joseph Zokunga Band music video siamte chu music video hmasa ber an ni. Joseph Zokunga hi Zorimawi khawvelah chuan sulsutu niin, nikum mai khan khawvel a chhuahsan tawh a ni.

Music video hmasa berte hi kum 1985-a Joseph Zokunga band-in guest artist-te nena an siam kha a ni. Music video-te hi amah Joseph Zokunga ruahmanna veka siam a ni a, amah hi producer leh director a ni nghal.

Joseph Zokunga band-ah hian mi paruk an awm a, vocalist hi Joseph Zokunga, Mapari leh Machhungi an ni a, guitarist hi VL Dawnga niin, Zothantluanga chu bassist a ni a, Matlana chu an drummer a ni. Anniho bakah hian music video siam tur hian guest artist an nei a, chungte chu C. Luri, Helen Zaithankungi Sailo. H. Laldanglovi, C. Vansanga, Lalneihthangi, RTC Lalduhawmi, C. Lalrinmawia leh Zirsangzela Hnamte te an ni.

Recording an tihna hmun hi Jeetei Recording Studio a ni a, vi≠deo hi K. Lalreia, Mizo videographer hmasa ber kutchhuak a ni. Hetih hunlaia K. Lalreia video camera hman hi Panasonic VHS M3 a ni a, video camera pakhat chauh hmanga lak vek a ni. An tihdan a la buaithlak viau a, video camera pakhat hmanga an lak laiin, video camera bulah chuan tape recorder hmangin hla kha an play ṭhin.

Heta music video an siamte hi Joseph Zokunga sak 'Self Control', 'Looking for love', leh 'Special Look'; Mapari 'I va ropui Ím!', 'What a feeling', 'If you love me let me know'; Machhungi 'Ka
ṭhian duh tak', 'Tawnmang', 'Di Valmawi' leh 'Zoram tan'; C. Luri 'Tlaitla Íng', 'Hringnun piah pialral'; H. Laldanglovi 'Va kal ta la,' 'Nghilh ni i awm hian ka ring lo'; C. Lalrinmawia 'Mitthlain ka hmu,' 'Zaleng hei zawng zingah hian'; Lalneihthangi 'Duhlai mampui,' 'Ka tling lo', 'I hlui dawn lo'; RTC Lalduhawmi 'Ka ṭhian duh tak, Madin'; Helen Zaithankungi 'Luah loh di hmelṭha'; C. Vansanga 'Nui mawi'; leh Zirsangzela Hnamte 'Ṭah a ṭul leh ṭhin' tihte a ni.