Donald Trump lak luhnaah Carrie Underwood a zai dawn

Country music star, Carrie Underwood chuan January 20, 2025-a US President thar atana Donald Trump lak luh inkhawmah a perform dawn tih a sawi.

Washington DC-a President thar lak luhnaah hian Underwood hian 'America the Beautiful' tih a perform dawn a, hetiang hun ropui taka zai tura sawm a ni chu a lawm hle tih sawiin, an ram mipuite pawh hmalam beiseina nena inlungrual taka an awm a ṭul thu a sawi. Trump lak luh inkhawm nia event buatsaih dang pahnih, Capital One Arena-a victory rally neihna leh Liberty Inaugural Ball-ah Village People pawh an inlan dawn bawk. Anni hi 1970 hit 'Y.M.C.A' leh 'Macho Man' aṭanga hriat lar an ni, heng hla pahnihte hi 2020 leh 2024 campaign rally-a Trump campaign team hi an hla play nasat-te an ni. Country singer Lee Greenwood leh opera singer Christopher Macchio te pawh an perform dawn bawk a ni. President atana lak luh anih hnuah Trump hian a lawmna, inaugural ball pathumah a telpui dawn a, Arlington National Cemetery a tlawh dawn bawk a ni.