Billboard 200 : No 1-ah 'SOS' a rawn kir

Billboard 200 album chart-ah SZA studio album pahnih, 'SOS' chu No 1-ah a rawn kir leh. A zawn loin chart-ah kar 12 chhung No 1 a ni thei ta.

'SOS' hi No 15-ah a tla thla hman a, mahse December 20, 2024 khan SZA hian a deluxe version, SOS Deluxe : LANA ti chhuak lehin, hla 15-ah a dah belh a, hemi hnu hian No 1 ah rawn kai chho leh ta a ni. Kar liam ta chhung khan US-ah equivalent album unit 130,000 neiin, a album-a hlate hian on-demand official stream mtd 166.31 an nei bawk. Top Streaming album chart-ah No 1 a ni bawk. Kar 12 chhung No 1-a a lanpui theih tak vangin SZA hian Whitney Houston hnua hmeichhe R&B/hip hop album No 1-a lanpui rei thei ber dinhmun a rawn luah ta a ni.

Krismas a zo tawh nain chart-ah Krismas album te dinhmun a la ṭha viau. Michael Buble 'Christmas' chuan equivalent album unit 100,000 neiin No 2-ah a lang. No 3 leh 4-ah pawh Bing Crosby 'Ultimate Christmas' leh Nat King Cole 'The Christmas Song' te an la lang. No 1 dinmun lo hauh tawh, Kendrick Lamar 'GNX' chu No 5-ah a tla thla thung.

Kum 2025 Billboard 200 album chart hmasa berah hian Top 10-ah Krimas album dang, Mariah Carey 'Merry Christmas', 'A Christmas Gift for You From Phil Sector' leh Frank Sinatar 'Ultimate Christmas' te an la awm bawk a, Wicked sountrack leh Taylor Swift te pawh an la inhamtang bawk.