Box Office: 'Mufasa'-in 'Sonic 3' a lehpel

North American box office-ah kum 2025 chawlhkar hmasa berah 'Mufasa: The Lion King' chuan 'Sonic 3' lehpelin No 1 a ni.

Kar liam taah film liantham tlangzarh thar an awm loh avangin Top 10-a awmte pawh an la ngai a, an dinhmun erawh a danglam tih chauh a ni. Disney film, live-action 'Lion King' prequel hian a kar thumnaah USD mtd 23.8 lak luh belhin, kar hnih chhung No 1 dinhmun lo hauh tawhtu, Paramount 'Sonic Hedgehog 3' a rawn lehpel. Hetih lai hian 'Sonic 3' pawh la a che ṭha zel a, No 2-ah awmin USD mtd 21.2 a la lut a, an inthlauhna pawh a tam lem lo. 'Sonic 3' hian North America-ah USD mtd 187 la lut tawhin, khawvel huapa a sum hmuh chhuah hi USD tld 1 a tling chho hnai tawh.

No 3-ah director Robert Eggers kut chhuak, 'Nosferatu' awmin, theater 2,992 aṭangin USD mtd 13.2 a lak luh belh. Krismas karah tih chhuah, he film hian USD mtd 69.4 a la lut tawh. Nikum November hit, 'Wicked' leh 'Moana 2' pawh an la che ṭha chhunzawm zel a, No 4 leh 5-ah an la lang. 'Moana 2' sum hmuh chhuah tawh hi USD mtd 960.5 a tling tawh a ni.

Bob Dylan biopic, 'A Complete Unknown' chuan a kar hnihnaah USD mtd 8.1 a hmuh belhleh a, he film-ah hian Bob Dylan lemah Timothee Chalamet a chang. He film budget hi USD 70 a ni a, tun thla chhunga a chet ṭhat chhunzawm zel a ngai viau. Erotic drama, 'Babygirl' chuan USD mtd 4.5 a la hmuh belh leh bawk.

2025 box office year hi a thawm la ring vak lo mah se kum 2024 ai chuan bul an ṭan tha a, kum thar chawlhkar khatnaa sum lak luh hi nikum aiin 20% velin a tam zawk a ni.