Drake-a'n look-alike contest winner tan USD 10k a pe

Tun laiin mi larte look-alike contest an buatsaih fo a, fan-te buatsaih a nih ṭhin avangin lawmman hranpa puitham tak erawh an siam ngai lem lo. Hetih lai hian Canadian rapper, Drake chuan an khua, Toronto-a look-alike contest siamah winner lawmmanah USD 10,000 a theh chhuak.

Drake hian a look-alike contest an siam tih a lo hriat hian, a buatsaihtu Casuals Cakery chu Instagram lamah be pawpin, lawmman atan USD 10k a theh chhuah tur thu hi a hrilh. He competition hi 'Drake Eras Lookalike Contest' tih niin, December 14, 2024 khan Toronto Apt 200-ah neih a ni. A buatsaihtuten winner lawmman atana an siam chu Hennessy um khat, Backoowd cigar pack leh thil dang tenau dangte a ni. Mahse Drake zarah, winner hian USD 10,000 a dawn belh ta a ni. Winner hi hmeichhia niin Makayla Chambers - aka Girl Drake a ni.