Mizo Hit Chart Half Yearly award sem

Zo Events.Org chuan nizan, December 16, 2024 zan khan AR Lammualah Gala Nite a buatsaih a, Mizo Hit Charts Half Yearly award an sem nghal bawk.

June thla khan kumin kum chanve hmalama mizo zaithiam, YouTube-a music video view ngah zualte hnenah award hi hlan a lo ni tawh a ni. Nizanah khan kum chanve hnu lam, June 1 - November 30, 2024 inkara Mizo music video tih chhuah zinga view ngahte hnenah award hi hlan leh an ni.

Gospel lamah Jonathan Lianhna a langsar a, kum chanve chhunga gospel music video view hlawh zual pathumah a lang thei a ni. Kumin chu Jonathan tan kum ṭha a ni a, music award hrang hrang pawh a hui hnem hle. Top 5-ah hian Synod Choir leh Melody for Christ an lang tel bawk.

Lengzemah K. Hminga leh Sangtei Khuptong te zaidunna, November 18-a an tih chhuah, 'Hmangaihna kawrawng' chu kum chanve chhunga view ngah ber a ni. He music video hi November 18-a an tih chhuah chauh ni mah se, view a nei ṭha hle. Blue Corn rawn comeback-na, 'Luah loh zun' chu view ngah pahnihna a ni bawk. Lengzem top 5-ah hian Latei Hringen & CT Tluanga, Youngfella x Smiley bakah Rebecca x Lil Kiki te an lang bawk a ni.