LBS Group-in kum 20 a tlin lawm; Kum 10 chhungin Suzuki Two Wheeler 80,000 an hralh

LBS Group chuan December 14, 2024 khan LPS Arena, Falkland-an kum 20 an tlin an lawm. Kum 20 chhunga an tana ṭangkaite ngaihlutna thilpek an hlan a, 2024 chhunga peng hrang hranga hnathawk ṭha leh hna ngai pawimawhte hnenah chawimawina leh Rs 5,000 ṭheuh an pe bawk.

LBS Group chairman, T. Zosangpuii chuan kum 2004-ah Rs 500-in Bawngkawn Chhim Vengah dawr an luah a, secondhand bike pakhat hmangin LBS Group hi din a nih thu a sawi. Tunah chuan company 12 an thawhpui mek a ni.

LBS Group hnuaiah automobile chi thum - Suzuki two wheeler, Kia car leh Force motor; furniture chi hnih - Evok leh Durian; oil chi thum - Gulf, Idemitsu leh Ecstar; battery chi hnih - Tata Green leh Exide; Mia Tanishq (tlereuh) leh World of Titans (sana)-ah dealership a awm mek a, hnathawk 200 dawn an chhawr.

Kum 2014 khan LBS Suzuki showroom hawngin rei lo te hnuah Mizorama lirthei ke hnih nei hralh tam ber an ni chho char char a, kum 10 chhungin 80,000 vel hralh tawhin an sumdawnna ti liantu ber a ni. Suzuki Big Bike authorised dealer ni telin November 2019 khan lirthei hlui a thara thleng theihna Best Value an hawng bawk. Managing Director H Ngurdingliana chuan anmahni puitute chungah lawmthu sawiin, mi tam tak hnathawh Pathianin mal a sawm avanga LBS Group din thei an nih thu a sawi.