Lehkhabu bawm : 'Hun inher kara Zofate'

Vanglaini regular columnist F. Vanlalrochana lehkhabu, 'Hun inher kara Zofate' tih chu December ni 14, 2024 (Inrinni) khan Lalnunṭawma Fanai-in a tlangzarh. He lehkhabu hi kum li zet a buaipui a, Fraser Media and Publication in an tihchhuah a ni.

Fraser Media and Publication, Kulikawna lehkhabu tlangzarhtu Lalnunṭawma Fanai chuan ṭhian ṭha nihna anga tlangzarh tura sawm a ni chu a lawm hle tih sawiin; hun inher zel karah, media khawihtu tam takin mipui an barh hi a fim em tih an inenfiah a ṭul thu te, Zofate inunauna kawngah state dang leh ram danga Zofate tan, Mizoram hi an Jerusalem a nih angin, inpui nghaktuten rilru zau put reng a ṭul thu a sawi.

Lehkhabu thlirlawktu David Lalrinchhana, Johnson College chuan he lehkhabuah hian Mizo mi ropuite chanchin kan hriat ṭul aṭanga Mizo hnam hun thlirna chenin a kim vek a ni tiin, Rs 500/- man chhungah hian Mizote tana hriattur pawimawh thu ril leh information ṭha tak tak cheng sang tam tak man khung a ni, a ti. "Hetiang lehkhabu ṭha bik hi a ziaktu tur âwm takin a rawn ziak a. Hnam chanchin phena a ziaktu hnam veina te, Mizo mi hmasate chanchin karah Mizo nih hi inchhuanna tham a nihzia te, mahni ṭanghma chauh ni lo, hnam hma hun thlir a ṭulzia te khung khawmna lehkhabu hi Mizo zawng zawngin chhiar se ka ti hle," a ti bawk.

F Vanlalrochana hian lehkhabu eng emaw zat a lo tichhuak tawh a, ṭhenkhat chu copy sing chuangte chhut a ni tawh. 'Hun inher kara Zofate' tlangzarh inkhawm hi Hmingsanga'n a kaihruai a ni. Instagram lamah Fit Lehkhabu dawr leh Lehkhabuk tihah lei turin order theih a ni.