Nikon Comedy Wildlife Photography Awards 2024: Overall winner 'Stuck Squirrel'

Khawvela photography competition hlimawm leh lar ber tia sawi ṭhin, Nikon Comedy Wildlife Photography Awards 2024 overall winner-ah Milko Marchetti thlalak, thing kawrawnga thehlei tang lai, 'Stuck Squirrel' tih chu thlan a ni. He thlalak hi mammal category winner a ni tel bawk.

Lawmman hi category pakuaah siam a ni a, kum 16 hnuai lam tan bik pawh siam tel a ni. Kuminah hian thlalak hi 9,000 chuang thehluh niin a luh tam ber ṭum a ni. Overall winner, 'Stuck Squirrel' hi Bagnacavallo, Ravenna, Italy-a lak a ni. Thlalatu, Marchetti chuan thehlei thla hi a hma pawhin a lak nasat ṭhin thu sawiin, lawmman a dawn takna thlalak hi a hlimpui hle tih a sawi. Marchetti hian lawmmanah Tanzania-a WonderWorkshop siam, trophy dangdai tak a dawn bakah Masai Mara, Kenya-ah safari a nei bawk ang.

Comedy Wildlife Photography competition hi kum 2015-a professional photographer leh conservationist - Paul Joynson-Hicks leh Tom Sullan te'n an siam ṭan niin, kumtin buatsaih a ni.

Kuminah hian People's Choice Category winner-ah mu in tipuk lai, Tapani Linnanmaki, Finland mi lak chu thlan niin, Nikon Young Photographer Award chu kum 10 mi, Flynn Thaitanunde-Lobb chuan uṭawk thla a lak hmangin a dawng a, award dawng thei naupang ber a ni.