'Pushpa 2' ni 8 chhungin Rs vbc 1,000 la lut

Allu Arjun channa, 'Pushpa 2' chuan ni riat chhungin global box office-ah Rs vbc 1,000 a la lut tling der. Indian film zingah Rs vbc 1,000 la lut thei pasarihna a nih bakah, he dinhmun thleng rang ber a ni bawk. A hmaa record lo siamtu, 'Baahubali 2' khan ni kua chhungin Rs vbc 1,000 hi a la lut thei a ni.

Pushpa 2 sum lak lut zingah Rs vbc 815 hi India ram chhung aṭanga a hmuh chhuah niin, ram pawn lam aṭangin Rs vbc 191 a la lut tawh bawk. An target hi Rs vbc 1,500 niin, hei hi an tlin theih pawh a rinawm. Indian film zingah Rs vbc 1,500 la lut thei hi pahnih chauh la awmin 'Dangal' leh 'Baahubali 2' te an ni. 'Pushpa 2' hi Sukumar direct niin, Allu Arjun bakah Rashmika Mandanna chuan a lead role a chang ve bawk. He film hi 2021-a chhuak, Puhspa : The Rise chhunzawmna a ni.