Selena Gomez leh Benny Blanco inhual

Singer/actress Selena Gomez leh record producer, Benny Blanco te chu kum khat chuang an inkawp hnuah an inhual tih December 11, 2024 khan an puang.

Kum 32 mi, Selena Gomez hian a Instagram account-ah an thu thar hi rawn puangin, thlalak pawh a dah chhuak a, an inhualna zungbunte pawh ti langin a hlim hmel hle. A pasal hual ni ta, kum 36 mi Blanco nena an thlalak dun pawh a dah lang tel bawk. Mi lar hrang hrangin an lawmpuina thu pawh an ziak a ni. Selena hian nikum December thla khan Benny Blanco nen an inkawp thu hi rawn nemnghetin, thla ruk an lo inzui tawh thute a sawi. Kum 2023-a Gomez hla, 'Single Soon' leh 2019-a 'I Can't Get Enough' tihah khan an lo thawk dun tawh a ni. Blanco hi a hming tak chu Benjamin Joseph Levin a ni a, music producer ṭha tak niin music industry-a langsar tak takte a lo thawhpui tawh a ni. Kum 2013-ah Songwriters Hall of Fame-ah chawimawi a ni tawh a, BMI Songwriter of the Year award vawi nga la tawhin, 2017-ah iHeartRadio chuan Producer of the Year-ah a lo puang tawh bawk.