J. Lalrosanga MV-in YouTube record siam

Youth Icon star, fanbase nei ṭha J. Lalrosanga chuan a official music video hmasa ber, 'Fuh Chiang lo maw' tih hmangin YouTube-ah Mizo music video zinga million view nei rang ber record a siam ta der mai.

Rsa hian Youth Icon intihsiakna zawh hnua a official music video hmasa ber hi December 6, 2024 khan a YouTube channel-ah ti chhuakin, nimin December 9 chawhma lamah khan 1 million view a nei tling a, ni thum pawh tling loah million view hi a nei thei a ni. Hriat theih chinah Mizo zingah YouTube-a 1 million view nei rang ber a ni. Hemi hmaa record lo siamtu chu Youngfella leh Mary Dawngi te sak, Youngfella hla phuah 'Duhaisam' kha niin, kumin January 13-a an tih chhuah a ni a, January 17 chawhma lamah 1 million view hi an nei a, ni thum leh a chanve chhung a duh a ni. Hei bakah Youngfella hla phuah tho, Rebecca Lallawmsangi nena an sak, 'Hriat ka duh' tih chuan ni ruk chhungin 1 million view hi a lo nei tawh bawk.