Khiangte Construction Ṭhazual GOSPEL : One in Christ-in hma an hruai

Mizo gospel group ṭha, One in Christ chuan Khiangte Construction ṭhazual Gospel chart tharah 'Krista hnehna changtute' tih hmangin hma an hruai leh ta.

One in Christ hi ṭhazual chart-ah an mikhual lo hle a, an hla eng emaw zat chu No 1 dinhmun an lo hauhpui tawh a ni. An zai a ngaihnawmin a nung a, zaia rawngbawlna kawngah pawh sawm hlawh ber zinga mi niin, Mizoram hmun hrang hrangah pawh an zin chhuak nasa hle.

No 1 hauhtu, 'Krista hnehna changtute' tih hla hi C. Laltlanliana phuah niin, Krista hnehna changtuten zam loa Kraws thu hrilin, dodalna leh sawichhiatna karah pawh Pathian kaihhruaina an dawn zel thu a rawn puang a ni. A thu a ṭhain, a hla a mawi a, a satuten an thiam bawk nen, ngaihthlak a manhla hle. Music hi Andrew Vanchhawng siam a ni. Recording hi Studio A-16 ah tiin, video hi RDS Shots kutchhuak a ni. OiC hian No 4-ah 'Ni Ropui' tih hla an lanpui bawk a, he hla hi Alvin leh Diki te lehlin a ni.

R. Lalrinmawii (Arini) hla thar, 'Ka tan a tawk' chu No 2-ah a rawn chho bawk. He hla hi Mangheta Jahau phuah niin, music hi Kima Chhangte siam a ni a, HC recordings ah record hi tiin, video hi 75 Visuals siam a ni. Champhaia gospel band ṭha, Amosa Vocal Point chu No 3-ah 'Chu ram mawiah chuan' tih hmangin an lang bawk. Anni band hian Ṭhazual Gospel Top 10-ah hla pahnih an lanpui bawk a, Krismas hla an tih chhuah thar, 'Lal Vakvai' chu No 10-ah a rawn lang bawk. Seraphic Choir chuan Krismas hla lar, 'Aw zan thianghlim' hmangin Top 5 an khar.

Ṭhazual Gospel Top 10-ah hian Lalramnunmawii, Zorinsanga Sailo, HC Lalramchhana & C. Lalhmingmawii te bakah KṬP, Chanmari West Branch an lang bawk a ni.