Box Office: Thawm nei lian zingah 'Moana 2'-in hma a hruai

North America-ah blockbuster pathum "Moana 2", "Wicked" leh "Gladiator II" ten Thanksgiving box office-ah sum la lut tam record an rawn siam. An zingah "Moana 2" che ṭha berin, tlangzarh karah USD mtd 135.5 a la lut thei.

Disney animated sequel, "Moana 2" hian North America bakah international-ah USD mtd 165.3 hmu bawkin, tlangzarh karah khawvel huapa a sum hmuh hi USD mtd 386.3 a tling nghal der. Kumin chhunga tlangzarh kara sum la lut tam ber dawttu a ni. A tirah chuan he film hi streaming series-a pek chhuah tum a ni a, mahse CEO Bob Iger-a'n a ngaihtuah ṭhat leh hnuah theatre-a tih chhuah a ni ta a, an ti fuh cher cher hle. Holiday season a ni chho bawk a, he film hian sum pawh a la lak luh belh viau rin a ni.

Kum 2016-a tih chhuah, original Moana film khan khawvel huapin USD 643.3 a la lut a, hei hi a chhunzawmna film siam hian tun kar chhungin a khum hman ngei dawn a ni. Auli'i Cravalho chuan Moana aw a rawn thawh leh a, Dwayne Johnson chuan Maui aw a rawn thawh leh bawk.

"Wicked" pawh a la che ṭha tluang zel, a kar hnihnaah USD mtd 80 la lutin a sum hmuh hi USD 264.4 a tling tawh a, Broadway adaptation-ah sum la lut hnem ber niin "Grease" a rawn khum.

"Gladiator II" pawhin USD mtd 30.7 hmuh belh lehin, Ridley Scott 2000 classic sequel hian North America-ah USD mtd 111.2 leh khawvel huapin USD mtd 320 a hmu chhuak tawh bawk.