Zaninah Mizo Film Award 2024

Entertainment Society of Mizoram (ESM) buatsaih, Mizo Film Award 2024 chu zanin hian Dawrpui Multipurpose Hall-ah sem a ni dawn ta. Minister of state, Lalnghinglova Hmar chu khuallian a ni ang.

Award hi category 15-ah sem a ni dawn a, kuminah hian panga belh thar a ni. Kumina category belh tharte chu Best New Actor in a leading role, Best New Actress in a leading role, Best Sound Design, Best Costume Design leh Best Documentary-te an ni. Best Documentary bik hi submit tura tih niin, 20 dawn a lut a ni.

Jury hrang hrang ruat niin, state pawn mi pakhat a tel ve bawk. Anni hian short list siamin, chu chu midangin an endik ve leh a, an point pek ṭheuh belhkhawm a ni. Mipui vote 30% a awm bawk. Mipui vote hmanga thlan chhuah, People's Choice Award a awm bawk.

Host Hruaitei kaihhruaia zanina hun hmanah hian tunlai zaithiam lar, J.Lalrosanga, Mary Dawngi, Youngfella, Zothana & Zodini leh Rebecca Lallawmsangi te an zai dawn a, Mizo Dance Camp lam an che dawn bawk.