KVS channel kut chhuak 'Dawt sawi suh' en theih dawn

YouTube lama hriat lar leh en hlawh, KVS channel kut chhuak, 'Dawt sawi suh' film chu zaninah Vanapa Hall-ah tlangzarh a ni dawn a, Lersia Play-ah zan dar 8-ah chhawp chhuah nghal a ni bawk ang.

'Dawt sawi suh' a changtute hi 'Hmanlai film Dangdai' a kan lo hriat tawh - Lalramluaha (Tleua), Zonunmawii (Hauchhumi), Hmingthanmawii (Sialchangi) leh Lost of the ring a misual nu Lalrohlui (Chawngi) te an ni. Anni bakah F Zomuankima, David Lalrintluanga, R Lalhmunsiama leh Lalbiakhluna Varte ten role pawimawh tak an chang bawk.

Director leh script writer chu Ramluaha (Tleua) niin, director of photography hi Deno Laldampuia a ni a, Lersia Play chu co-producer a ni. KVS chanel hian film puitling pathum - Hmanlai film dangdai, Thuruk leh Tihpalh tihte an lo siam tawh a ni. 'Dawt sawi suh' pawh police pakhatin ruihhlo tawlhru a chhuina niin, a film hi hlimawm tak a nih rualin, a lungngaihthlak lamte pawh a tel a ni. Vanapa Hall-a tlangzarhnaah hian a hmuna en duh tan ticket Rs 100 man siam a ni.