Superman lema chang leh turin a fan-te'n Henry Cavill an duh
Social media lamah #HenryCavillSuperman chu a trending mek a, Henry Cavill fan-te chuan Cavill hi Man of Steel lema chang leh turin an duh a ni.
Henry Cavill hian hman deuh lawk khan Superman thuam a la dahṭha lo tih a lo sawi zuai tawh a, fan lam pawh an phur hle a nih kha. Mahse khami hnu khan helam chungchang hi sawilanin a awm zui tawh lem lo. Hetiang hi ni mah se a fan-te chuan an beiseina an hlawhchham tir duh lo a, social media lamah #HenryCavillSuperman chu rawn vawrh lar thar lehin Cavill-a Superman hi an la hmu kham lo tih an lantir.
Khawi aṭangin nge he campaign hi inṭan hriat ni chiah lo mah se twitter lamah chuan tunah hian a trending mek a, fan tam tak chuan Man of Steel cape haa Cavill chevel chu an hmuh leh chak thu leh Superman tura actor ṭha ber a nih thute pawh an sawi uar hle.
Fan-te authawm hi Warner Bros hian an la chhang lo thung a, Justice League movie chungchangah erawh fan-te duh angin chhanna an lo pe tawh a, tuna fan-te authawm hi an duh angin an chhang dawn em tih erawh hriat a chakawm tawh hle.
Henry Cavill hian nikum kum tawp lamah khan Superman cape chu a closet-ah a la dah reng tih sawiin, a ta a la nih reng thu leh a role chu a la bansan lo tih a sawi. Superman tana pek tur tam tak a la neih thu leh thawnthu sawi zawh lo sawi chhunzawm tur a awm thu a lo sawilang zuai tawh a, hei hi fan-te chuan an bengkhawn hle tih a hriat a, tunah chuan a DC universe-a a kir leh ngei theihna atan hian an campaign ta a ni.