Billboard 200: "CHROMAKOPIA" a chungnung zel

Billboard 200 album chart-ah Tyler, the Creator chuan "CHROMAKOPIA" chu a kar hnihna atan No 1 ah a lanpui chhunzawm.

Kum 33 mi, hip hop artist Tyler, the Creator album thar ber, "CHROMAKOPIA" hi October 28-a tlangzarh a ni. Album hi a tlangpuiin Zirtawpniah an ti chhuak ṭhin a, ani erawh chuan Thawhṭanniah a tlangzarh thung a ni. Kar liam ta khan US-ah equivalent album unit 160,000 nei lehin, album-a hla 14-te hian on-demand official stream mtd 160.1 an nei bawk. Album sales hi 44,500 neiin, Top Album Sales-ah No 2-ah a la lang a ni.

"CHROMAKOPIA" hi Tyler, the Creator studio album pariatna niin, album chart-ah No 1 ni thei a neih pathumna a ni. A zawna kar hnih chhung chart chung ber luah thei a neihna hmasa ber a ni thung.

No 2-ah Sabrina Carpenter "Short n' Sweet" rawn chhoin, equivalent album unit 68,000 a nei a, Lil Uzi Vert "Eternal Atake 2" chu tlangzarh karah No 3-ah langin, equivalent album unit 59,000 a nei bawk. The Cure "Songs of a Lost World" chu No 4-ah awmin, kum 1992 hnua band-in chart-a an thlen san ber ṭum leh, kum 2004 hnua top 10-a an lan ṭum khatna a ni. Gracia Abrams "The Secret of Us" chu No 5-ah a awm bawk.