10th Ṭhazual Award Lengzem: Best Male leh Female artist-ah Young Fella leh Lilac

Zonet Cable TV Ltd buatsaih, 10th annual Ṭhazual Award chu zawh fel a ni ta. Lengzem-ah Best Male Artist-ah Young Fella thlan niin, a kum zawnin he award hi a dawng ta a ni. Best Female Artist-ah Lilac thlan a ni bawk.

Ṭhazual Lengzem-ah hian category pakuaah award sem a ni a, Young Fella chuan award pahnih lain, Mary Dawngi nen 'Duhaisam' tih hla hmangin Song of the Year award an dawng.

Best Female Artist Lilac-i band, Lilac & Jack band chu Band of the Year atan thlan an ni bawk a, he category bik hian Gospel leh Lengzem a huam a ni.

Lengzem lama zaithiam chhuak thar kan neih ṭhat zinga mi, Zothana chu Best New Artist ah thlan niin; ṭhalai naupang zawka tla na tak Mendal chu Best Pop Artist-ah thlan a ni bawk.

Hla ṭha,mawi leh ngaihnawm tak tak rawn phuah chhuaktu, H.O.M chuan Best Songwriter award a dawng a, Siampuii Ralte chuan 'Lengi' hmangin Best Music Video a dawng bawk. A music video hi Reuben Lalmalsawma siam a ni.

Ṭhiang zaia inkawp fuh em em, aw inchawih mawi tak mai, Aengi & Rosalyn chu Group/Duo of the Year atan thlan an ni bawk.

10th Ṭhazual Award zan hnihna, Lengzem zan hi host Rini Hlondo kaihhruaina hnuaiah November 8, 2024 khan Dawrpui Multipurpose Hall-ah neih a ni a, hemi zan hian tunlai Mizo lengzem artist kan neih ṭhat leh boruak nei lian tak takte an inlan a, an zaithiam bakah stage-a an che vel a hmuhnawm a, a manhla lehpek hle. Entertainer dik takte kan hmu e.