10th Ṭhazual Award: Award 3 dawng thei Jonathan Lianhna

Zonet Cable TV buatsaih, 10th Ṭhazual Award Gospel zan, November 7, 2024-a neih zawh takah Jonathan Lianhna a langsar a, Best Male Artist atana thlan a nih bakah a hla phuah leh a sak, 'Ka pawn lam landan' chu Song of the Year atan thlan a ni.

Gospel zanah hian category pasarihah award sem a ni a, Jonathan Lianhna hian a kum zawnin Ṭhazual Best Male Artist award a dawng thei ta a ni. Kuminah hian Zorema Khiangte leh Uncle Joe-te nen a hla phuah an sak ho, 'Beiseina' tih chu Best Music Video award an dawnpui bawk. He music video hi M Space Malsawma Fanai siam a ni.

Best Female Artist Gospel-ah Mizo hmeichhe zaithiam zinga aw chak leh sang ṭha, tleirawlte a nih aṭanga a zai thiam avanga Zoram dengchhuak thei, Zoramchhani thlan a ni. Best New Artist-ah 'It's a beautiful day' tih hla hmanga rawn lar chhuak, Champhai Vengthlang nula zaithiam Laldinsangi thlan a ni a, a lar chhuahna hla ngei hi hemi zan hian a perform nghal bawk.

Gospel group ṭha, zaia rawngbawlna lama sawmtu ngah leh thawh hlawk tak, 'Seraphic Choir' chuan Best Group/Duo award an dawng. Anni pawh award sem zanah hian an perform bawk a, an zai ngaihthlak a nuam leh hle.

Zai thiam, hla phuah thiam bawk Israela Pachuau hnenah Best Songwriter award hlan a ni.

Host Zonuni Pachuau kaihhruaina hnuaiah Ṭhazual Award Gospel zan hi Dawrpui Multipurpose Hall-ah hlawhtling taka neih a ni. Hemi zana zaithiam inlante an zai thiamin an che vel hmuh a nuam a; musician-te inbuatsaihna a ṭha tih a hriat bawk. A hmuna chhimtute tan chauh ni lo, TV leh online lama lo thlirtute tan pawh mit leh beng a tlai leh hle.

10th Ṭhazual Award Gospel category-a award dawngtute :

Best Male Artist - Jonathan Lianhna

Best Female Artist - Zoramchhani

Best New Artist - Laldinsangi

Best Group/Duo - Seraphic Choir

Song of The Year - "Ka pawn lam landan" Jonathan Lianhna

Best Music Video - Jonathan Lianhna, Zorema Khiangte & Uncle Joe "Beiseina" (M Space Malsawma Fanai)

Best Songwriter - Israela Pachuau