Mizo film thar MILTA (Zualtei Charms)

Khiangawia, Zokhaw Thunder, Zo Trio film-te hmuhnawm taka Mizo ṭawnga ti chhuaktu, Lura Chhakchhuak (Khiangawi Production) movie siam hmasa ber 'MILTA (Zualtei Charms)' chu zanin hian Vanapa Hall-ah tlangzarh a ni dawn ta.

He film hi chhungkuaa en ho theih tur, Mizo te rilrem tur taka duan a ni. Romantic comedy niin, Mizo film danga kan la hmuh ngai loh hla nalh leh dangdai, hlimawm si - 'Chawnban Barbie', 'Chukchu Lady', 'Hlim mai teh' leh 'Tleitir Biangnote' tihte chu hmuh leh ngaihthlak tur a awm dawn. He film-ah hian ṭhianṭha hlutzia leh ṭhiante tana inpe ral raihte hmuh tur a awm dawn bawk.

A changtute hi C. Lalruatfeli, Duhawma Hmar, Malsawmdawngzuala, Lalmuanpuia Sailo, Malsawmdawngzeli, Vanlahriatpuia leh JS Tharmawia te an ni a, director Lura Chhakchhuak niin director of photography hi Johny Ngurthansanga a ni. Vanapa Hall-a en duh tan hian ticket Rs 200 leh Rs 100 siam niin, a hmunah lei theihin a awm dawn a ni.