Fashion Fiesta
Thawmhnaw thar lei tura Bazar han chuan chhuah meuh chuan duhzawng leh awh zawng a tam duh khawp mai. Aizawl khawpui angah te chuan khawpui dangte ang lo takin han Bazar dawn pawh ni ila, Bazarna tur hmunpui, thil han lei maina turte a tam lem lo bawk a, Solomons Cave leh Millenium Centre-te hi Shopping Mall lian kan neih chhunte a ni mai. Bazara han hawi khawthawnna tur a tam lem lo hle. Hei vang tak hian thil dangdai leh danglam deuh hlek duh tan phei chuan Bazarpui angah te hi chuan a tam duh lo hle a, thil inang a tam hle a ni. Chung zingah chuan han belchiang deuh la, khawchhak lam aṭanga thawmhnaw rawn chhuk thla, abikin T-Shirt leh Top lamah te a hmaa thil in-print nalh tak tak i hmu ṭhin ang. Heng zingah hian Logo common em em mai pakhat ilo hmuh fo tawh ṭhin ngei ang le. Chu Logo chu 'C' lehlam lehlam hawi zawnga invuakthuah, thawmhnaw mai ni lo Purse leh Bag te, naupang thawmhnaw leh Bakkilh/ Samṭawnna eng ilo velah te ilo hmu fo tawh ṭhin ang. Ṭhenkhat chuan kan chik em em lo mai thei. He Logo common zet hi Logo dangte aia danglam bikna em em awmin lang lo mah se khawvelin a hlut em em lawi si a ni. A hlut em avanga khawvela logo copy (entawn) tam ber a ni reng a ni. Hetiang khawpa mite hlut leh ngainat hlawh tur khawp hian eng tiang chiah nge he Logo hian awmzia a neih i han zirchiang dawn teh ang.
AD 1883 Aug 19-ah chuan Fashion hmunpui tia miten kan hriat lar France khawpui pakhat (Saumur)-ah chuan Eugenie Jeanne Devolle chuan pa tel loin fanu duhawm tak a nei a, helai hmuna Damdawi In pakhat, Catholic hmeichhe hoina an enkawlah chuan puansuk hna thawkin a fanu Gabrielle Bonheur Chanel, khawvelina kan hriat lar tak em em hi a enkawl seilian a, amah hi nu hrisel lo ve tak niin, Bronchitis nei chungin a fanu hi a enklawl ve hram hram a, a fanu kum 12 anih thleng a dampui thei hram. A fa neihna pa erawh hi chu kawngsir vela thawmhnaw zuara sumdawng kual ṭhin mi a ni. Eugenie leh a fate hi a ngaihsak lem lo a, anu a boral hnu phei hi chuan Chanel leh a unaute chu France khawpui pakhat Aubazine-a an convent-ah chuan a dah ta daih a, heta ṭang hian Chanel hian a nulat thlengin hnuchham Inah a hun a hmang chho ta zel a ni.
Home-a a awmlai aṭang tawh hian zai a ngaina chho hle a, hnuchham Ina awm e ti lo chuan a tleirawl chhuah chhoh aṭang tawhin mihlim thei tak, mi biangbiak thiam tak, zei hah mai anihna te pawh hi a niang, a hnu kum tam tak thleng pawha mite ngainat leh duh anih chhoh tak zelna chhan. Retheih nun leh, nu leh pa kara seilian lo nun hrechiangtu anih vangte pawh aniang, rilru a neiin nawmsak tum ranin mi hausate leh challang zawkte huang chhungah a nulat chhoh pawh hian hun a hmang tam ta reng a ni. Cafe pakhat lar ve tak mai, mi hausa leh Sipai lianho fuankhawmna hmun Moulins Pavillion-ah chuan kum 18-a pelh hnu, Convent-a chhuahsan meuh chuan zaiin ei a zawng ṭhin a, helai hmuna hun tam zawk hmang ṭhin sipai Officer liante duh leh ngainat a hlawh chho hle a, vawiin thlenga khawvelin kan hmelhriat chhoh tak, Coco tih hming a put chhan pawh hi helai hmuna a hla sak fo ṭhin hla hming pahnih lak kawp, Ko Ko Ri Ko leh Qui Qua Vu Coco, France ṭawnga Cocotte hmeichhe inla tak sawina atana a hman aṭang hian Coco Chanel tiin miten an lo hmelhriat chho ṭan a. 'Tianga zaia ei a zawnna lamah hian sipai captain pakhat, Capel nen intawngin amah hi incheina ngaina mi tak leh hausa tak mai a ni a, a hausakna zar zovin 1913 khan Deauville-ah Boutique a hawnsak ta a ni. Kum 6 chuang Convent-a a awm chhunga a lo zir tawh puanṭhui chu eizawn nan a hmang chho ta a ni. Designer dangte aia a rawn lar chhoh tak vakna chhan chu khang hunlai khan kawrfual kawng tifek at thei (Corset) kha hmeichhe tam zawk inchei dan a ni a, Chanel erawh chuan Sports Wear leh Casual te siam chhuakin hmeichhiate tan incheina tlakah a her remsak a, Indopui II-na a lo thlen meuh chuan a dawr chu titawp rihin 1954-ah khan Switzerland aṭangin Paris-ah let lehin vawiin thlenga Chanel hmunpui lo ni taah hian a inbengbel chho ta a ni.
A kutchhuak leh thilsiam chhuah tawhte sawi vek dawn ila kan sawi seng dawn lo a, amaherawhchu designer dangte aia danglam bik anihzia tilangtu pakhat Chanel No. 5 Perfume, khawvela perfume lar ber, a lar em avanga perfume Bottle mai ni lo, a ziarang hmanga phone cover te, Ice Cream te, Sweet te, Clutch te kan hmelhriat tak fo nachhan hi a ngaihzawng pa Capel Zu bur chhin dangdai tak mai ziarang aṭanga a siamchhuah a ni. Kan sawi hmaih theih loh tur Chanel Hand Bag 2.55 phei hi chu Fashion khawvelah hmeichhiate bung thar min kaitirtu pakhat a ni a, he Sling Bag lar zet mai hi khang hunlaia hmeichhiaten puipun nikhuaa an Bag ken ṭup reng chhawk zangkhai nana a aha ah chia a siamchhuah aṭanga lo lar ṭan a ni. He Iconic Bag 2.55 hi a hming put chhan a ho ang reng hle. February 1955, a an siamchhuah a ni tihna mai a ni. A ahna tura chain a hman kher nachhan chu a tleirawl laia Convent-a an awm ṭhin laia an sister ten Chabi ken awlsam nan an kawngah chain thlung kualin a karah Ribbon inkaihkalaka an thlun kual ṭhin aṭanga he idea hi lo nei ta a ni. Vanduaithlak takin AD 1971 January ni 10 khan Designer ropui leh khawvelin an ngaihsan, fashion khawvelah pawh thawhhlawk tak mai chu khawvelin a chan ta a ni. A sulhnu te a hlui thei lo, khawvelin a hlutin vawiin thlenga a entawn nasat ber a ni ta reng a ni.
Tluangpuii Hmar
Instructress
Vakiria Institute of Fashion Technology