India ramah Maroon 5 concert

American pop-rock band, Maroon 5 chu December 3, 2024 hian Mumbai-ah an rawn perform dawn a, India rama public concert an neih hmasakna ber tur a ni.

BookMyShow Live chuan Mahalaxmi Racecourse-ah Adam Levine leh a band hi an inlan dawn tih a puang. Ticket hi November 2-ah BookMyShow-ah Kotak Credit Card customer bik tan lei theih a ni dawn a, mipui nawlpui tan November 8, chawhnu dar 2 aṭangin lei theih a ni thung ang. Maroon 5 hi India ramah kum 2019 khan an rawn perform tawh a, mahse hei chu private concert niin, Mukhesh Ambani fapa, Akash Ambani leh Shloka Meta te inneih lawmnaah an perform a ni. September thla khan nakkum January 29 aṭangin Asia tour an neih tur thu puangin, Philippines, Indonesia, Thailand, Japan, Malaysia leh Taiwan-ah show an nei dawn.