Leitlang Pictures film thar, 'Blackmail' tlangzarh dawn

Mizo Film Industry sulsutu zinga mi pawimawh, tun thlenga film la siam peih kan neih tlemte zinga pakhat C.Lalhmangaiha (Mapuia Chongthu) Film siam, 'Blackmail' chu zanin, November 1, 2024 zan hian Saikuti Hall, Lunglei ah tlangzarh a ni dawn ta.

'Blackmail' hi tunlai thalai aṭanga kum upa, mimal nun leh chhungkua thlenga nghawng thei thil tarlanna a ni. Sangau nula B. Lalthuthlungthari, 2020 Miss Mizoram contestant chuan Sainunpari role a play a, film a chan vawi khatna a ni. Andrew Lalruatkima chu Kolasib Pa, Sawma Chawngthu a rawn ni dawn thung a, ani hi 'Nunna Thar','Ambush - a war Story' leh film dang eng emaw zatah a chang tawh a ni. 'Ambush - a war story' leh 'Hremhmun Short cut' ah changtute zinga mi , R. Lalnuntluanga, Lunglei College veng chu Upa Zarzosanga a rawn ni dawn a, Philip B. Rammuana chuan Zorinsanga role a rawn play ve bawk ang.

He film siam nan hian Rs nuai 10 ruahman a ni a, August 15, 2024 khan shoot ṭanin, September 15 ah zawh a ni a, a film pumpui hi Thenzawl leh a chhehvel hmunah chan a ni. Leitlang Pictures neitu, Mapuia Chongthu chuan he film siamnaah hian mihring mi 30 vel an inlan a, pawl leh ṭhian ho anga rawih zawng zawng nen chuan mi 80 -100 velin tha an thawh tih a sawi.