'APT'-in ni 11-ah view mtd 200 nei tling

Blackpink member, Rosé leh Bruno Mars music video thar, 'APT' chuan October 30, KST-a chawhma dar 11:16 khan YouTube-ah view mtd 200 a nei tling. View mtd 200 nei tur hian ni 11 leh darkar 22 a duh a ni.

'APT' hi kumina music video tih chhuah zinga view mtd 200 nei rang ber a ni a, Rosé pawh hi Korean hmeichhe solo artist zingah music video view mtd 200 nei thei rang ber a ni ve nghal bawk. Rosé hian a bandmate Lisa in 'Lalisa' hmanga ni 13 chhung view mtd 200 neia record a siam chu a rawn khum a ni. 'APT' hi Billboard Global 200 leh Billboard Global Excl. US chart-ah No 1 a ni mek a, Billboard Hot 100-ah No 8 niin, Rosé hi K-pop hmeichhe artist zingah chart top 10-a lang thei hmasa ber a ni.