Indian Gaming Market a ṭhang chak

India ramah gaming market a ṭhangduang hle a, financial year 2024 chhunga USD tld 3.7 tling chho tur leh, kum 2029-ah chuan USD tld 9.8 tling tura chhut a ni.

Market intelligence business, 1Lattice in zirchianna a neihnaah, gaming market ṭhan chakna chhan chu hardcore leh mid-core gaming vang a ni tiin, kum nga chhungin a ṭhanna hi 47% vel turin a chhut.

India ramah hian internet hmang ṭhin mi mtd 920 awmin, smartphone hmangtu hi mi mtd 820 vel an awm. Kum 2023 ah game khel ṭhin hi mi mtd 560 an awm tling bawk. Gaming industry tan market base ṭha tak a ni tawh. Tunah hian gaming company 1,400 chuang leh, developer 15,000 vel an awm mek.

Game khel ṭhin an punna chhan hi connectivity ṭhat chhoh tawh vang te, smartphone man tlawm ṭha tak awm vang leh digital payment tih len zel a nih vangte a ni bawk. India rama game khel ṭhin zinga 45% chu kum 29 hnuai lam an ni.

Sorkar laipui pawhin gaming sector-a theihna awmte hriain, a puala hmalakna turin 2022-2023 budget-ah Animation, Visual Effects, Gaming and Comics (AVGC) Task Force pawh a lo siam tawh a ni. Kumin September thla khan union cabinet chuan gaming industry pualin Mumbai-a National Centre of Excellence (NCoE) dinna tur pawh a pawm bawk. Hemi hmang hian hna 500,000 siam tum a ni. E-sports chu legitimate sports ah pawm a ni a, Ministry of Youth Affairs and Sports chuan sports development programme-a telh dan tur pawh a zawng mek bawk.