Fashion Fiesta
Vocational School of Education Fashion Show 2015 chu ni 24.04.2015 zan dar 8:00 khan Lalthanhawla Auditorium-ah hlawhtling taka neih a ni a, zirlai chhungte leh mipui lamin an hlut hle. He show-ah hian Vocational zirlaite 1 Year Fashion Design Course-zir mek ten an thawmhnaw design mawi tak tak chu Zoram chhunga kan model nalh tak tak ten rawn phochhuahsakin, fashion show hmuhnawm tak an rawn entir. Zirlai 14 niin, an thawmhnaw ṭhui collection-ho tan hian theme chi hrang ṭheuh thlangin, portfolio felfai tak nen, story board leh mood board, colour board leh client profile-te siamin collection changtlung tak an rawn pho chhuak a ni. Portfolio-bik hi tlemin han sawi zau deuh ila, designer-ten thawmhnaw an duan chhuah dawn reng rengin khawi eng ilo vel aṭangin idea an nei ṭhin a, ramsa a ni emaw thing leh mau a ni emaw an ni tin nunphunga an thil tawnte a ni emaw, rawng leh an mihringpuite chenin engkim a leng vek. Heng idea neihtirtu a hi thawnthu angin an siam a, chu chu story board kan tih chu a lo ni ta a; mihring reng reng chu kan rilru put hmang a zirin kan thil siam chhuahte a danglam thei ṭhin hle a ni. Chung chu mood board-kan tih chu a ni a, tichuan kan thawmhnaw siam chhuah tura te chu rawng inzul deuh hlek (theme-khat anih thin avangin)-in siam a ni ṭhin.
Hetia rawng inzul/inchawih mawi deuh veka thawmhnaw siamchhuah tura te chu colour board hmanga duan a ni ṭhin. Thawmhnaw mawi tak tak ṭhui ila, a hman ṭangkaina, a ha tu, a leitu tur an awm chuan si loh chuan a ṭhuitu tan chuan insen thlawnna mai anih ṭhin avangin, thawmhnaw design a nih ṭan tirh aṭangin tute nge ha ang a, tuin nge lei duh ang tih tinzawnin thawmhnaw hi duan chhuah a ni fo ṭhin. Mimal hisap deuh hlek anih phei chuan, a duh ngei ngei tur anga duan chu client profile hmanga siam a ni ṭhin. Heng zawng zawng hi felfai taka zirlai 14-te hian zirtirtute enpuina hnuaia an siam hnuin thawmhnaw chi nga (5) ṭhui tura tih an ni a, thawmhnaw pakhat (1) ṭheuhah hian design sawmnga (50) siamin zirtirtuten a nalh leh ṭha zual paruk (6) thlang chhuakin chung paruk zinga mawi ber pakhat chu zirlaite hian show tur atan hian an siam chhuak ta a ni.
Vocational School of Education, Chaltlang hi 2012-khan din ṭan a ni a, he institution-in a tum ber chu eizawnna kawng hrang hranga ṭhalaite zirtir leh kawhhmuh a ni. Mahni kut kea ding thei ngei tura ṭhalaite thiamna pek hi a tum ber pakhat a ni bawk. Mizoram Sorkar, School Education leh Ministry of Labour and Employment, Govt. of India-ah registration fel tak neiin 1 Year fashion designing course chauh lo pawh Class XI leh XII-ah Commercial Garment and Design Making leh, thla ruk chhung puan ṭhui zirna designing tel lo te, zir theih turin an buatsaih nghe nghe a ni. Tunah hian mi 80 vel bawrin heng Course hrang hrangte hi an zir mek. Heng bakah hian anmahni hian order lain School Uniform hrang hrang, naupang leh puitling kawrte order leh readymade mipui tan an chhawp chhuak bawk a ni. He Institution tichangtlung lehzualtu chu Class XI leh XII bikah hian Scholarship felfai tak pek an ni ṭhin a, designing-a tui, sum lama harsatna nei deuh tan phei chuan thil ṭha tak a ni. Heng bakah hian zirlaite hi anmahni duhthlanna ngeiin Mizoram pawnah Study Tour te neihpui ṭhin an ni.
He show atana inpuahchahna hi rei tak aṭangin a neitupa Sir Marema leh faculty-ten felfai taka duangin thla hnih kalta aṭang khan an lo inbuatsaih daih tawh a ni. He show hma kar khat liam ta khan pawn lam mi designer ṭha tak takte sawmin jury neih a ni a, Mizoten fashion designer kan neih hmasak ber Pi Lucy Sailo, mipa designer lama tawnhriat ngah leh thiam em em mai Vanlalruata (Veruata) leh Brand lar Mango-ah te pawh sulhnu lo nei nual tawh DP Sailo ten zirlaite thawmhnaw phochhuah tur chu endikin, category hrang hrangah mark an pe a ni. Best collection, (collection ṭha ber) R. Lalhlimpuii, Bawngkawn chuan lain Best Craftmenship (kut themthiam ber) Lalrinzuali, Armed Veng chuan lain, Lalruatfeli, Dawrpui Vengthar chuan Commercially Viable Collection a la a, Most Promising student-ah V.L. Thlamuanpuii, Central Jail Veng thlan a ni a, Most Creative Collection-ah Lalrinfeli Hrahel, Muthi te chuan lawmman Certificate leh Trophy-te an dawng a, hei mai bakah hian Lucy Special Award siam niin Lalhmingchhuangi, Durtlang chuan lawmman pawisa fai leh certificate, Judge Pi Lucy Sailo hnen aṭangin a dawng bawk. He show tihmuhnawm zual em emtu chu hun reilote chhungin kalphung felfai tak (Cheography) leh hmuhnawm tak, designer leh cheographer Charlie, Heritage Mizoram sulhnu kan hmu a, zaithiam Henry Varte leh Sangtei Khuptawng ten mipuite an awi. Darkar khat leh a chanve chhung lekin he show hmuhnawm tak hi zawh fel a ni a, zirlaite thawmhnaw mawi tak tak model zei tak takin an rawn phochhuak chu mit a tlaiin a hmuhnawm hle. Kan sawi hmaih theih hauh loh tur chu hemi zana model-te nalh em ema cheisaktu Remrema, Tanhril, kut themthiamna hmuh theihin model-te hmelah a lang a ni. He show chhimtu zingah i tel lo anih pawhin rei vak lovah cable TV hrang hrangah hmuh theihin an rawn phochhuak thuai ang, i lo ngaihven dawn nia.
Tluangpuii Hmar
Instructress, Vakiria Institute of Fashion Technology