Met Gala 2025 theme “Superfine: Tailoring Black Style”

Vogue magazine chuan Met Gala 2025 theme atan “Superfine: Tailoring Black Style” thlan a ni tih Nilaini khan a puang a, mahse an theme thlan hian sawisel zui a hlawh hle.

Theme atana an thlan hi mihangten kum zabi 18-na aṭanga vawiin ni thlenga fashion lamah nghawng an neih dan chungchang a ni. He theme hi kum 2009-a chhuak, Monica L. Miller lehkhabu, 'Slaves to Fashion: Black Dandyism and the Styling of Black Diasporic Identity' aṭanga an ngaihtuah chhuah niin an tarlang. Dress code tur hi an la puang leh dawn a ni.

Met Gala 2025 co-chair turte musician Pharrell Williams, actor Colman Domingo, Formula One driver Lewis Hamilton, musician ASAP Rocky bakah Vogue editor-in-chief Anna Wintour te an ni dawn a, basketball star Lebron James chu honary co-chair a ni bawk ang.

Met Gala hi Manhattan, New York-a Metropolitan Museum of Art's Costume Institute in kumtina fundraising festival a buatsaih ṭhin a ni. Khawvela fashion event pui leh ngaihven hlawh bera sawi a ni ṭhin. A hma chuan Costume Institute Benefit tih a ni ṭhin. Kum 1995 aṭang khan Anna Wintour huaihawtna hnuaiah neih a ni ṭhin a, kumtinin he event aṭanga sum an hmuh hi a pung chho zel a ni, eight figure a tling chho tawh a ni.

Theme thlan hian internet lamah sawizui a hlawh hle a, mi tam tak chuan fuh lo an tih thu leh, an theme hi mi ngote beihna remchangah hmanna tur nia an ngaih thute an tarlang.

Met Gala hi May thla Thawhṭanni hmasa berah neih a ni ṭhin. Meta Gala 2025 hi May 5,2025 hian New York City-a Metropolitan Museum of Art ah neih a ni dawn a ni. Guest list hi an puangzar lawk ngai lo.