Stage-ah Brian May a inlan leh thei ta

Queen legendary guitarist, Brian May chu August thlaa stroke a neih avanga hun eng emaw chen a inenkawl hnuah, stage lamah a inlan leh thei ta.

Kum 77 mi ni tawh, iconic guitarist hian a Instagram-ah Red Special Convention-a guitar a play-na video dahin, thla hnih hnua guitar a khawih lehna hmasa ber a nih thu a sawi. A fan-te pawhin an lawmpuiin, stage lianah pawh a inlan chhunzawm zel theih nan duhsakna an hlan nasa hle. September 4 khan May hian a stroke thu hi a sawiin, a ban veilam chu a hmang ṭha thei lo tih a sawi. Kum 2020 khan May hian heart attack neiin a lo thi ṭep tawh bawk. A stroke hmaa stage a a inlan hnuhnung ber kumin February thlaa Japan a Queen-in five-date tour an neihah khan a ni.