Box Office: No 1-ah beisei pha lo 'Joker: Folie a Deux'

Tlangzarh a nih hma aṭanga ngaihven hlawh tak, 'Joker' sequel 'Joker: Folie a Deux' chu North American box office-ah No 1 ni mah se, tlangzarh kara a sum lak luh chuan beisei a pha lo hle.

Creative team-ah hian a film hmasa amite vek la awm mah se, review lam pawh a hmu ṭha lo. Rotten Tomatoes score pawh premier ṭuma 68% chu kar tawpah 33% ah a tla thla nghal a ni. A film hmasa, kum 2019-a tih chhuah khan tlangzarh karah USD mtd 96.2 a la lut a, a sequel pawh hi a che ṭha viau tura beisei a nih laiin, tlangzarh karah hian North America-ah USD mtd 40 chauh a la lut thei a ni. Internation-a a sum hmuh hi USD mtd 81.1 niin, khawvel huapa a sum lak luh hi USD 121.1 a ni a, mahse hei pawh hian beisei aiin a la hniam hle. An bvudget hi USD mtd 190 chuang a tling a ni. He film hi Todd Phillips direct niin, Joaquin Phoenix leh Lady Gaga an chang a ni.

Lionsgate film thar, 'White Bird' pawh a flop a, tlangzarh karah USD mtd 1.5 chauh la lutin No 7-ah a lang pha hram. Critics leh audience review a nei ṭha viau chungin a sum lak luh erawh a beitham hle.

DreamWorks Animation kut chhuak, 'The Wild Robot' erawh a kar hnihaah USD mtd 18.7 hmuin, No 2 ah a awm. Tim Burton 'Beetlejuice Beetlejuice' leh Paramount 'Transformers One' pawh an hlawhtling zel a, Top 5-ah an lang zui zel a ni. 'Beetlejuice Beetlejuice' sum lak luh hi USD mtd 402.6 a tling tawh a, theatre hrang hranga tih chhuah a nih hnuah nimin aṭang khan digital-a tih chhuah a ni a, video-on demand platform hrang hrangah lei theih niin, November 19 hian Blu-ray/DVD a tih chhuah a ni leh dawn bawk.