Emmy Awards 2024 host atan Indian actor Vir Das

Indian actor-comedian, Vir Das chuan November 25, 2024-a New York City-a neih tur, 2024 International Emmy Awards a host dawn.

International Academy of Television Arts & Sciences chuan Nilaini khan host tur hi an puang a, Vir Das pawhin a social media lamah share-in, a phur hle tih a sawi. Vir Das hi stand-up comedy bakah television project eng emaw zatah a thawk a, international comedy scene lamah pawh a langsar zingah a tel. Kum 2021 khan Emmy Award-ah hian comedy category-ah 'Vir Das: For India' tih chu nominate a lo ni tawh a, kum 2023-ah Netflix-a a comedy special, 'Landing' hmangin award a lo dawng tawh bawk. Das hi India comedy-rock band, Alien Chutney lead singer a ni bawk a, tun hnaia Amazon Prime series, 'Call Me Bae' ah a chang bawk a ni.