J&M Sofa LPS Comedian Search pakhatna Zamsuankhama

J&M Sofa LPS Comedian Search Season 16 chu Zirtawpni liam ta, September 6, 2024 zan khan zawhfel a ni a, fiamthu thiam berah Champhai Zion Veng tlangval, Zamsuankhama thlan a ni.

Mizorama reality TV show kalpui rei ber, Comedian Search hi kumin hi a season 16-na niin, August 2 aṭang khan neih ṭan a ni. Judge-te chu H. Rotluanga, Lalhruaitluanga Chawngte leh Darrokima te an ni a, host Mafeli Hlawndo leh co-host Zosangzuala te an ni. September 6 zanah Grand finale hi neiin, Top 5 te an inel a. Fiamthu thiam berah Zamsuankhama thlan niin, pahnihnaah Lalruatdika, Bilkhawthlir leh pathumnaah Zothansanga, Rawpuichhip te thlan an ni bawk.

Kumin Comedian Search main sponsor hi J&M Sofa a ni a, pakhatna lawmman dawngtu hian pawisa fai Rs 1,00,000, scooter leh TV bakah swing chair a dawng a, pahnihna hian Rs 50,000, refrigerator leh Ottoman storage a dawng a, pathumnain Rs 30,000, washing machine leh Ottoman stool a dawng bawk a ni.