Zonet Arkaiden Zan: Valzotea Zan
Zaninah Zonet Arkaiden Zan hman a ni leh dawn a, hla phuah thiam Valzotea pualin hun hman a ni dawn. Zonet Zawlbuk, HD leh Zonet Empai Apps-ahte live-a pek chhuah a ni ang.
Tun ṭum hi Arkaiden Zan ṭum lina tur niin, Woodland Hills, Zonuam-ah zan dar 8 aṭangin hman a ni dawn. Host Zonuni Pachuau kaihhruaina hnuaiah zaithiam tak takten Valzotea hla phuahte an sa dawn a ni. Valzotea chanchin tarlanna video display neih a ni dawn bawk a ni. Valzotea chhungte lam aṭangin thusawi tawi ngaihthlak a ni ang a, Zonet Director Lalnunpuia'n Citation hlanna hun a hmang dawn bawk a ni.
Zanina hun hmanah Valzotea hla an sak turte hi - Kir an rel lo, Suihlunglen, Ngaihlungrun, Lelte Nunem, Dam takin Mangṭha, Di Enchimloh, Hrilh a hai ngei a, Hlimlai ni, Ka di ka parmawite, Nuimawi nang nen, Hellai di, Ṭha parmawi, Runmawi leh Sakhmel mawi tihte an ni.
Valzotea hla sa tur zaithiamte chu :
Lalthuṭhaa
Faktea Chhangte
Lalrindiki Renthlei
F. Zomuanpuia
Marina Varte
Mathlenga
Lalhmangaihzuali (Nunui)
R.Zoliana (Valzotea)( 1958- 2001) hi Mizo hla thu ṭha tak mai hmanga hla phuah thiam a ni a, a hlate hi sak a nuamin a lunglenthlak hle. A hla tam tak hi tun thlenga sak hlawh tak tak an la ni hlawm.
Kum 1983 khan hetih laia Aizawla ṭhalai chanchinbu lar, Ainawn Teenagers Weekly chuan a hla phuah zinga mi 'Sakhmelmawi' (Rose par rimtui min thliah la) chu Best Pop Song of the Year-ah a puang a, a hla dang 'Runmawi' chu 3rd Best Song of the Year-ah a puang bawk. A hla phuahte hi Pathian hla 7 leh hla dang 27 a ni a, hengte hi 'Val-Zo Songs' tiin hlabu a siam a, a kut ziak ngeiin a dah khawm a ni. A hla tam tak hi All India Radio-a record niin, a hla sa lartu zingah C. Vansanga, K.Lalchamliana, Lalrinmawii, Lalneihthangi, Liandailova Chhangte leh K. Lalbiakveli te an tel.
Valzotea hi mi lungleng thei tak niin, a hun awl tam zawk chu guitar perha zai nan a hmang ṭhin. Chutianga a hun hman aṭang chuan a hla phuah tam zawk hi a lo piang chhuak a ni. Mizo hla thu ṭha a ngaina a, sap hla thluk leh rhythm mawi, Mizo hlaa hmehbela inhmeh tur a hre hle bawk. Rimawi a ngaihthlak rualin ama lamah hla a lo piang mai ṭin. Heng vang hian a hlate hi a thluk leh a thuah a hausain, sak a nuam a, a hunlai mite bakah ṭhangtharte tan pawh a hlui lo, mawi reng thei an ni.
A boral hnuah a unau leh ṭhiante hmalaknain Zoliana Tribute Committee din a ni a, 'Valzotea Hlate' tih bu leh, a hla phuah 13 awmna audio album an siam a, a hun laia zaithiam larten mawi takin an sa a ni. Album-a hlate hi music video siam a ni bawk a, copy pawh an hralh chhuak hnem hle. 27th April, 2004 khan Valzotea tribute concert buatsaih a ni a, a hlawhtling hle bawk. Kum 2016 khan a hla phuah thiam avangin “Heritage Wall of Fame” ah seng luh a ni.