Zo Awi Zunzam: Lalthansanga Ralte pualin hun hmang dawn

DDK Aizawl chuan Zofate zinga zaithiam leh hla phuah thiam fam tate puala thla khat dana hun a hman ṭhin, Zo Awi Zunzam live programme chu zanin, August 29 zan hian a hmang leh dawn. Zanin hian zaithiam leh hla phuah thiam, Lalthansanga Ralte (1959-1998) puala hun hman a ni ang.

Zo Awi Zunzam live programme hi zanin dar 7 - 9 hian DDK Studio, Durtlangah hman a ni dawn a, zaithiam hrang hrangten Lalthansanga Varte hla phuah leh hla sak larte an sa dawn. Zo Awi Zunzam hi episode 10-na tur a ni a, music hi Zonun band-ten tumin, sound lam hi Delta Sound ten an buaipui dawn a ni.

Lalthansanga Ralte hian audio cassette pathum a siam hman a, radio artist niin hla 69 a khung a, Pathian fakna hla panga a tel. DDK-ah hla panga a khung bawk. Hla 20 vel a phuah a, a hla phuah zingah hian AZZ sak, 'Dil chhin ila' tih leh, H. Zaitluangi leh H. Lalṭhakima te sak, 'Min phuar vawng vawng' pawh a tel. A hla lar zingah hian, 'Ka nu, ka ṭanglaiah min vuan', 'Min phuar vawng vawng', 'Lalngo ṭah ka bang dawn lo, 'Enchim loh Ngaihzuali', 'Aw Ngaihzual', 'Mahriak ten ar-ang ka vai e Parte' te pawh an tel a ni.

Zanina zaithiam zai turte -

Lallawmpuia Fanai
Johan H.Lalmalsawma
Lalnunkenga Chuaungo
Lalfamkima Ralte
Zoherliani
K.Lalthlamuankimi