Khiangte Construction Ṭhazual Gospel No 1-ah Hlimhlimi 'Ropui ber kan fak a che'

Khiangte Construction Ṭhazual Gospel-ah Hlimhlimi chuan ama hla phuah, 'Ropui ber kan fak a che' chu No 1-ah a lanpui.

Hlimhlimi hian pasal fanau a neih hnuah pawh zai lam a chawlhsan mai lo a, zai lama rawngbawlnaah pawh a theih angin a la inhmang zui zel a ni. Khawvel nawmsakna, malsawmna leh hlawhtlinna aia Pathiana kianga awm a hlut zia; chawimawina aia chawimawitu, malsawmna aia malsawmtu Pathian ropui ber fakna hla ṭha tak a rawn phuah chhuak a, a zaithiam bawk a, a mawi vawng vawng hle. Music composition & mastering hi taktakrecords kut chhuak a ni a, vocals recording hi HC Recording Studio-ah tiin, a video hi WoWv Production siam a ni thung. English subtitle dah ni bawkin, hei hi Zothansanga Khiangte & Mafeli Hlawndo te siam a ni.

Nancy Zothanmawii 'Ka chakloh apiangin' chu pahnihnaah a awm a, ani pawh hi chhangchhe nu ni chungin a khat tawkin hla a ti chhuak thei reng a, a fakawm hle. A zaithiamin a zai a la ngaihnawm em em reng a ni. Mipa gospel artist kan neih ṭhat zinga mi, Zorinsanga Sailo chuan a hla thar, 'Min hruai turin ka thlang ber che' chu pathumnaah a rawn chhoh pui a, a zaithiamzia sawi nawn a ngai lo, chart lamah hma a sawn chhoh zel pawh a rinawm.

Ṭhazual Gospel Top 5-ah hian Seraphic Choir 'Chawimawina leh lawmna' leh, Ablaze 'I thisen vangin' tih chu an lang bawk. Top 10-ah hian lang thar panga an rawn awm a, chungte chu Thawhlehnaniropuia, Malsawmdawngzuali, One in Christ, Angaihtei & Mama Hlonchhing leh Benjamin Zawlneisanga te an ni.