Mizo film hautak 'Million Dollar Boy'

Mizo film siam hautak tak mai, thil thleng tak tak behchhana siam, 'Million Dollar Boy' chu peihfel a ni hnai ta a, August 30, 2024 hian tlangzarh tum a ni.

He film hi kum 2002-a Assam leh Meghalaya inkara misualin Aizawl-Guwahati sumo an suam ṭuma a u leh a chuanpuite aiawha pawisa hmuhna atana an hruai tura inpe, Mizo tlangval chunga thil thleng behchhana siam a ni. Director hi Lalnunsiama (SVP) niin, an film siam hi a hautak hle tih a sawi. "Assam hmun karkik tak taka kal a ngaih vangin kal leh haw kawngah ringawt pawh motor-in kilometre sing chuang kan tlan hman. Film ka lo siam ve nual ta a, mahse he film aia hautak leh buaithlak hi a la awm lo," a ti, cast & crew te inpekna avanga ti chhuak thei an ni dawn tih a sawi.

A changtute hi "Ambush" film aṭanga kan hriat lar Sangtea Chhangte leh, zai leh film chan lama sulhnu ṭha tak nei Andrew Laltlankima te an ni. Script hi CKṬP film, "Hnehtu" script ziaktu Sangtea a ni a, Lenry Renthlei chu director of photography niin, costume hi Buanga Chhangte leh MUA hi Hmangaihi Renthlei a ni.