LZa'n thirsakawr hmangin India hmâr tàwp a thleng ta

Thirsakawr hmanga India ram fan chhuah tuma thang mek Vanlallawmzuala Varte @ Lza, Mission Veng chuan India hmar lama a thlen tawpna tur Ladakh (union territory) khawpui, Leh a thleng tawh a, km. 11,885.76 a tlan tawh.

Mizoram Pollution Control Board bultuma 'Ride to Clean Air' thupuia hmanga zin mek Lza hian January 25, 2024 khan Aizawl a chhuahsan. Ni 171 leh zan 170 a thang chhungin ni 121 a tlân a, a bak ni dang chu a chawlh hahdam bakah, state hrang hranga pollution control board-te leh university hotute nen hun an hmang ho.

Ni 121 chhungin km. 11,885.76 a tlan tawh a, ni khatah km. 97.99 zel tlan ang a ni. Ni khata a tlan thui ber ṭum - February 21 khan km. 158.49-a thui a tlan a, a tlan tawi ber ṭum February 9-ah km. 34.73 a tlân. A tlan chak lai berin July 10 khan Saspul leh Leh inkarah 64.3 km/hr-in a tlân a, a tlan muan ber lai April 4 khan Rameshwaram - Danushkodi Point inkarah 23.1 km/hr in a tlân.

A tlanna kawng sang lai ber chu Srinagar leh Leh inkara Fotu La a ni a, ft. 13,479 vela sang a ni. Calorie burn tawh zat chu 3,19,392 niin, ni khata a burn tam ber ṭum July 6 khan 5,780 a tling.

Lza hian Mizoram tel loin state 19 leh UT panga paltlang tawhin, state khawpui tin a tlawh a, PBC eng emaw zatin chawimawina an lo hlân a ni.

Hmar lama a thlen tawpna tur Ladakh khawpui Leh chu July 10 khan a thleng a, July 11 khan Ladakh PCB-te nen hun an hmang ho. Nimin khan ft. 17,582 (metre 5,359)-a sang Khardung La a tlawh a, vawiin hian Leh chhuahsanin Shimla lam a pan dawn a; chumi kalkawngah chuan vawiin hian ft. 17,688 (metre 5,391)-a sang Chang La a tlawh ang.