Taylor Swift 'Folklore' nek chhuak zo an la awm lo
Billboard 200 chart-ah Taylor Swift chuan 'Folklore' hmangin ro a la rel a, US-ah 'Folklore' aia album hralh kal a la awm lo.
Kar hmasa lamah khan 'Folklore' hian Taylor Swift ropuina a belhchhah nasat zia leh rimawi khawvela mi bikte zinga chhiar tel loh theih loh a nih tawh zia kan tarlang tawh a, chu a ropuina chu belhchhahin a la awm zel dawn niin a lang.
Taylor Swift hian Eminem ang deuhin puangzar lawk lutuk lem loin 'Folklore' hi a tlangzarh thut a, hetichung hian US-a album hralh kal ber ni nghalin Billboard 200 chart No.1 a rawn ni nghal a, kar nga chhung he dinhmunah hian a ding tawh a ni.
Kar hmasa khan Swfit hian 'Folklore' hmang hian US-ah chuan 98,000 equivalent album unit a la hmu chhuak a, hei hi Nielsen Music/MRC Data tarlan dan niin kar hmasa leh lam aiin 3%-in a tlahiam.
Drake album 'Scorpion' hnua kar nga chhung No.1 dinhmuna ding thei leh hmasa ber chu 'Folklore' hi a ni a, karleh lamah pakhatna a nih leh chuan Drake hnua Billboard 200 chart No.1 hauh rei ber a ni dawn. Drake hian 'Scorpion' hi June, 2018 khan a tlangzarh a ni.
Swift hian Pathianni zana sem tak MTV Video Music Awards-ah khan 'The Man' music video vangin 'best direction award' a dawng a, 'The Man' hi nikuma a tihchhuah 'Lover' album-a mi kha niin a album hmasa huhang a reh hmain a album tharin rimawi khawvel nasa takin a al leh der tawh tihna a ni.
Ropuina rama a len mek lai hian chart tharah eng nge a la an zel dawn tih erawh hriat a chakawm tawh. Zirtawpni liam ta khan hun eng emaw laia boruak ṭha vak lo a neihpui tawh Katy Perry chuan album thar 'Smile' a tlangzarh a, US-ah 'Smile' nge 'Folklore' hralh kal zawk dawn tih pawh hriat a chakawm tawh hle.
John Mayer-a 'ex'-te pahnih hi hun eng emaw lai khan an inhmu thiam vak lo a, mahse an boruak a ṭha leh tawh a, social media lamah pawh inngeih taka an thlalak dunnate pawh hmuh tur a awm leh tawh a ni.
Pop Smoke leh Juice WRLD
Pop Smoke 'Shoot For The Stars Aim For The Moon' album chu kar hmasaa a dinhmun ngai, pahnihnaah a la ding a, rapper fam ta Juice WRLD album 'Legends Never Die' pawh pathumna bawk a ni leh.
Pangana Nas album 'King's Disease' chu chart-ah a rawn inlan thar a, The Killers album 'Imploding The Mirage' pawh a inlan thar bawk a ni.
Billboard 200 chart Top 10:-
1 Folklore Taylor Swift
2 Shoot For The Stars Aim For The Moon Pop Smoke
3 Legends Never Die Juice WRLD
4 Hamilton: An American Musical Original Broadway Cast
5 King's Disease Nas
6 My Turn Lil Baby
7 Pray 4 Love Rod Wave
8 Imploding The Mirage The Killers
9 BLAME IT ON BABY DaBaby
10 Hollywood's Bleeding Post Malone