Hnehna Ropui Musical Film 'remake' Sept 11-ah

Vanneihthluanga ziah 'Hnehna Ropui Musical Film' kha kan la hre hlawm em aw? Kum naupang lam deuh chuan an hre tawh lo mai thei a, chutih rual erawh chuan kum 30 bawr ho chuan an naupan laiin a film hming hre kher loin an en tawh ngei a rinawm a, puitling lam phei chuan an hmelhriat sa tawh ngei ang.

Kum 1996-a Chan­mari Branch KṬP-in thiam taka an lo chan tawh leh cable TV lamah pawh a hunlaia tihchhuah hlawh tak chu Chanmari Branch KṬP chuan an Diamond Jubilee pualin an siam thar leh a, September 11 hian Zonet-ah an tichhuak dawn.

He musical drama atan hian Zonet leh Chanmari Branch KṬP chuan inremna siamin kumin chhung hi chuan Zonet-ah chauh chhuah a ni ṭhin dawn.

'Hnehna Ropui Musical Film' hi KṬP Drama intihsiaka an chan a ni a, a hunlai kha chuan a lar ṭhin hle a, tuna siam thar a ni leh pawh hi en chak tawh an tam hlein a rinawm.   
Hnehna Ropui buatsaihtu MS Dawngkima, Chanmari Branch Leader chuan, "Musical Film ṭha tak kan hruaitu hmasate hmalakna kan tharthawh leh thei hi kan lawm em em a, he film buatsaih tur hian kum hnih chuang hun kan hmang a; a hmuhnawmin kan hlawhtling viauin kan hria. A changtu leh a phena tha thawhtu zawng zawng, kan branch member hlui leh tharte kan ni hi kan tan a hlu em em a. Zonet nena kan thawkho thei hi kan lawm em em bawk. Pathian ropui nan he film hi min lo thlirsak a, thlirtute'n thlarau lamah hlawkna eng emaw tal an chan ngei kan beisei a ni," tiin an film thar tur chungchang a sawi.

Aw thawhtu an ṭha dawn
Chamari Branch KṬP hian ram pum huap zaithiam lar an nei ṭha hle a,  musical drama tharah pawh hian zaithiam lar tak takten an aw an thawh dawn. Zoramchhani, DJ Lalvenhimi, Jerry Lalrinawma leh Isaac Lalhruai­tluanga te zai kan ngaihthla thei dawn a ni.