India sorkarin PUBG Mobile a 'ban' ta

Ladakh-ah China leh India sipaite inkarah buaina a chhuak leh a, chumi tuartu langsar ber chu mobile gamer-te an ni dawn niin a lang.

India chuan nimin khan Chinese apps 118 'ban' belh a nih thu thuchhuah a siamah a tarlang a, chung zingah chuan mi tam tak hlauhthawn ang ngeiin Players Unknown Battle Ground (PUBG) Mobile pawh a tel tlat mai.

"Kan hmalakna hi India mahnia ro a inrelna leh a inpumkhatna, India humhimna leh venhimna ngaihtuahna vang a ni," tiin sorkar laipui chuan thuhchhuah an siamah an tarlang.

India ramah hian PUBG Mobile player hi maktaduai 33 dawn an awm nia hriat niin, Ministry of Electronics and Information Technology chuan Information Technology Act Section 69A hnuaiah he mobile game hi 'ban' a ni tih an tarlang a, India ram himna leh inpumkhatna tichhe theiah an puh a ni.

"India cyberspace himna leh venhimna ngaihtuah reng chungin thutlukna kan siam a ni. India mi mobile leh internet hmangtu vaibelchhe tél chu kan hmalakna hian a hum dawn a ni," tiin an tarlang zui bawk.

India sorkar hian June thla khan Chinese mobile app 59 a lo 'ban' tawh bawk a, chung zingah chuan TikTok leh UC Browser-te pawh a tel.

Chinese app India-in a ban thar zingah hian Rules of Survival, Arena of Valor: 5v5 Arena Games, MARVEL Super War NetEase Games, Cyber Hunter leh WeChat reading-te pawh a tel a ni.