Vawiinah Lal Zakapa film tlangzarh dawn

Mizo lal ropui leh huaisen, Lal Zakapa Fanai biographical film chu vawiin chawhnu dar 1 hian Cultural Centre & Auditorium, Vaivakawn-ah tlangzarh a ni dawn ta. Zaninah Runmawi App lamah en theih tura chhawp chhuah a ni bawk ang.

Kawhri lal, Zakapa Fanai chanchin hi kum 1839-1914 inkara thil thleng, British-in min awp hun lai a ni. Mizoten 'Marliana' an tih mai, hetih hun laia Superintendent MC Murray-a'n a bial a fannaa Mizo lal hnenah ran talh tur leh coolie a ngen ṭhin bakah, zana mutpui tur nula ngen a ching ṭhin bawk. Mahse lal huaisen Zakapa chuan nula a ngen chu lo pe ve duh loin, amah leh a khauten an tawrh phah hial a ni. Hei vang hian Lal Zakapa hi Mizo hmeichhiate humhimtu anga sawi a ni ta a ni.

He film siamtu hi TC Vanlalzaua a ni a, Mizo film tana sulsutu hmasa zinga mi niin film pawh hi eng emaw zat a lo siam tawh a ni. Script writer hi Zoa hnamte a ni a, a document hi Zakapa Award Committee buatsaih a ni thung. State Tribal Resource & Training Centre (TRI), Directorate of Social Welfare & Tribal Affairs, Govt of Mizoram leh Ministry of Tribal Affairs Govt. of India te puihna hmang a siam a ni. Zautea chuan, " Lal Zakapa film siam hi a hautak hle mai a, sum leh paiah duhthusama inpuih theih a nih loh vangin Directorate of Social Welfare & Tribal Affairs hian a siamtute hi Runmawi Apps lamah thla 10 chhung dah min phal sak a ni, " a ti.