Box Office: Kevin Costner 'Horizon'-in danglamna thlen zo lo; Inside Out 2 bawk a chungnung leh

North American box office-ah Kevin Costner personal project, 'Horizon' chuan beisei a rawn pha lo hle a, danglamna a thlen zo lo a, 'Inside Out 2' bawkin hma a hruai chhunzawm zel.

Pixar 'Inside Out 2' hian a kar thumna atan box office-ah ro a rel leh a, USD mtd 57.4 a lak luh belh leh. Khawvel pum huapa a sum lak luh hi USD tld 1 a tling der tawh a, animated film zingah USD tld 1 la lut rang ber a ni. Paramount action horror, 'A Quiet Place: Day One' chuan tlangzarh karah USD mtd 53 la lutin, khawvel huapa a sum hmuh hi USD mtd 99 a tling bawk a, pahnihna dinhmun a rawn hauh. He prequel hian tlangzarh karah USD mtd 40 vel la lut tura beisei a nih laiin a rawn khum a ni. Rotten Tomatoes-ah 84% hmuin, CinemaScore-ah B+ pek a ni bawk.

Hetih lai hian thawm nei lian hle tura rin, Kevin Costner 'Horizon' chu theatre 3,334-a tih chhuah a ni chungin tlangzarh karah USD mtd 11 chauh a la lut pha a, beisei a pha lo hle. USD mtd 100 senga siam western epic hian Rotten Tamotoes score 40% chauh a hmuh pha a, CinemaScore-ah pawh B- pek a ni.

North American box office Top 10-ah hian Indian film pahnih, Telugu sci-fi epic 'Kalki 2898 AD' Punjabi romantic comedy, 'Jatt & Juliet' an rawn lang ve bawk. Prabhas, Deepika Padukone, Amitabh Bachchan, Kamal Haasan leh Saswata Chatterjee-te channa, 'Kalki 2898 AD' hian khawvel pumah USD mtd 68 a la lut tawh a ni. Kumin chhunga Indian film zinga tlangzarh nia sum la lut hnem ber dinhmun a lo hauh tawh bawk.