Lersia Play : June thlaa entu ngah ber '1999 Hiraeth'

June, 2024 chhunga Mizo movie streaming app, Lersia Play-a entu ngah ber chu June 14-a tih chhuah, '1999 Hiraeth' a ni.

'1999 Hiraeth' hi film dangdai tak, black comedy leh Christian mystery kaihkawp a ni. Raymond Colney ziah leh direct niin, co-writer hi Zoparmawii a ni. A changtute pawh kan hriat lar, Mizo film lama sulhnu nei ṭha tak tak - Zopari (Green Rocket TV), Papuia Pachuau, Rosangpuii (Rspi) te niin, anni bakah Mizo hmeichhe zaithiam Mary Dawngi leh Miss Mizoram lo ni tawh, Zirsangpuii te an inlan bawk. He film hi Ramfangzaua'n a nuna duhthlanna a siam hmanga a tum leh beisei dan ang niloa a bul hnai leh a chhehvela awmte nun a nghawng tel dan chungchang a ni a, a dangdaiin a hmuhnawm hle.

June thla chhunga Lersia Play-a film hralh chhuah tam pahnihna chu YouTube-a KVS channel-a show hmuhnawm leh hlimawm tak chhawp chhuak ṭhin, Tleua leh a ṭhiante channa, 'Tihpalh' a ni. Director leh script writer hi a changtupa ber, Tleua tia kan hriat, Lalramluaha a ni, producer hi Ramboss leh Khalthang Arts niin, Lersia Play hi co-producer a ni bawk. A changtute KVS channel aṭanga kan hmelhriat sa, Ramluaha bakah Hmingthanmawii, Zonuni leh Darneihpuii te an ni a, F. Zomuankima leh David Lalrintluanga ten role pawimawh tak an chang bawk.

Mizo film director ṭha leh hriat hlawh, Mapuia Chongthu, Leitlang Pictures Production kut chhuak, 'Hremhmun Shortcut' chu film hralh tam pathumna niin, ani hian film puitling hi 15 chuang zet a siam tawh. 'Hremhmun Shortcut' hi action/comedy lam hawi niin, mi naran pasarih, tum naran lo tak neite hausakna shortcut lamtluang chanchin a ni. Fanai Pictures movie pahnihna, 'Zu Zuar Fanu' leh In-House Production film, 'Kan chhungkua' chu June thla chhunga film hralh ṭhat zual panga zingah an la lang bawk a ni.