Mizoramah kumin 2024-ah ruihhlo vangin mi 42 thi tawh

Excise & Narcotics department (END) chhinchhiah danin, Mizoramah kumin 2024-ah ruihhlo vangin mi 42 an thi tawh a; kum 1984 aṭanga June 25, 2024 thlengin ruihhlo vangin mi 1,854 an thi tawh.

Kum 1984 aṭanga kumin June 25 thlenga ruihhlo vanga thi mi 1,854 zinga 1,630 (87.92%) chu mipa an ni a, mi 224 chu hmeichhia niin, ruihhlo vanga thi zawng zawng aṭangin 12.08% an ni.

END tarlan danin, kumin 2024 bikah June 25 thleng khan ruihhlo vangin mi 42 an thi tawh a, mipa 35 leh hmeichhia pasarih an ni a; kum 22-50 inkar an ni. Kumina ruihhlo vang thite zinga mi 31 chu heroin ti ṭhin an ni a, heroin leh ruihhlo dang tih pawlh mi 10 leh alprazolam leh ruihhlo dang tih pawh mi pakhat an awm.

Kum 1984 aṭanga kumin June 25 thlenga Mizorama ruihhlo vanga thi mi 1,854 zinga mi 1,161 (62.62%) chu spasmo proxyvon/ parvon spas ti ṭhin an ni a; mi 264 (14.24%) chu heroin ti ṭhin niin, mi 429 (23.14%) chu ruihhlo pakhat aia tam tih pawlh an ni.