Mizo film dangdai, psychological horror movie 'Thih thlengin aw'

Mizo film industry-in hma a sawn nasa a, film genre hrang hrang pawh a rawn chhuak zel. Hetih lai hian hun eng emaw chen horror lam thawm a reh hnuah, OBG Production chuan psychological horror movie a rawn chhawp chhuak dawn a, July thla tir lamah en theih a ni ang.

Movie chhuak thar tur, 'Thih thlengin aw' hi a taka tawngtute thil tawn behchhana ziah niin, kum 2021 October aṭang khan script hi an ziak tawh a, nikum kumtawp lam khan a story hi changtlung zawkin an duang leh a ni. Kumin February thla khan shooting hi an zo. Rokhawlhna a awm loh chuan July 6 zan hian Vanapa Hall-ah release tum a ni a, release rual hian Lersia Play lamah en theih tura chhawp chhuah a ni nghal dawn bawk.

'Thih thlengin aw' ah hian Kima Renthlei (OBG Production) chu director niin, script writer hi Vanlalawmpuia (opix renthlei) a ni a, PC Lallawmzuali chu co-writer a ni a, a changtunu role a la bawk. Actor kan neih ṭhat Papuia Pachuau chu a changtupa a ni dawn. Anni bakah Mizo film lama kan lo hmelhriat tawh - Zuali Chhangte leh Mary Kim pawhin role pawimawh tak an rawn chang dawn bawk a ni.