Mizo Hit Charts 2024: Zorema Khianga leh Youngfella x Mary Dawngi ten pakhatna an hauh

Zo Event Organisation chuan Mizo Hit Charts 2024 ( Half Yearly) buatsaihin, kumin kum chanve chhunga Mizo zaithiam, YouTube-a an music video view ngah zualte hnenah award an hlan.

Mizo Hit Charts 2024 (Half Yearly) hian kumin January 1 aṭanga May 31 inkara YouTube-a hla dahte a huam a ni. Awards hlanna hun hi June 26, Nilaini zan khan Zarkawt Community Hall-ah neih a ni a, hemi zan hian zaithiam lar tak takte an perform bawk.

Gospel lamah Zorema Khiangte 'Mal min sawm' tih chuan view a ngah ber. He hla hi May 17-a dah ni chungin, view 1,95,906 a nei hman a, ni khatah view 13,993 nei zel ang a ni. A hla dang pakhat pawh view ngah Top 10-ah hian a lanpui bawk.

Lengzem-ah kumin January 13-ah an upload, Youngfella x Mary Dawngi 'Duhaisam' chuan view 1,39,75,348 zet an nei a, nikhatah view 93,794 zel nei ang an ni. Youngfella bawk a langsar leh a, Top 10-ah hian hla dang pahnih a la lanpui thei bawk a ni.