July thla tawp lamah 'The Sky is Ours'

Wayward Production kut chhuak, Mizo film nghahhlelhawm ber zinga mi, 'The Sky is Our' chu July thla tawp lama tihchhuah hman beisei a ni. Zonet Empai-a tih chhuah turin Wayward Production leh Zonet TV Pvt. Ltd. chuan June 25, 2024 khan inremna an ziak.

'The Sky is Ours' hi Mizo film puitling, India ram pawna shoot hmasak ber niin, November 2023 aṭang khan shoot ṭan a ni. A OST, 'Thlah lo turin' - Lilac and Jacks sak pawh a hit hle a, YouTube-a dah chhuah a nih aṭanga ni 10 chhungin view 626K a nei hman.

Musical score leh foley hi Lalsangliana Zadeng, (SLA Production) Leeds, UK-a awm mek kut chhuak a ni a, Estee Lauder Beauty Advisor lo ni tawh, Dina Varte-in make up lam a buaipui a, Lalrinenga (Vavoo Interior)-in set design a khawih bakah a scene mila thawmhnaw hak tur thlangtu (stylist) hi Andria Fanai a ni.

Mizo film budget sang ber pawlah hian, Mizo model lar pathum, Lalrinzuala, Kima Hmar leh Christina Pautu te an chan bakah, India rama foreign model hlawh sang ber lo ni tawh, Brazilian model, Chris Rodrigues a chang bawk. Mizo actor thawm nei lian, Timothy Vangchhia a chang tel a, Henry Hmangaihawma, Lalduhawmi leh Miss East India 1995 Runner Up, Zikpuii Sailo te’n role pawimawh lain, tun hnaia Mizo film Industry-a hming langsar, Maruata Rawite leh Sangsangi te an inlan bawk.

Director hi Jeremy Hauhnar a ni a, DOP-ah Jon Mizo an hmang a, executive producer Lalsangpuii Hnamte niin, Zaithanmawia leh David Lalmuanpuia te produce a ni.

Zonet chuan Zonet Empai aṭanga an en theih na'n Online Payment bakah Mizoram hmun hrang hrangah voucher hmanga lei theih tura zawrh an tum. Chhungkuaa en theih tur PG ratings bakah, 18+ ratings a hrana siam a ni a, Northeast audience tinzawnin English Sub-title dah a ni bawk ang.