Glastonbury-ah Indonesian all-girl metal band

Khawvel huapa festival lar, British major event tia sawi ṭhin, Glastobury Festival 2024-ah Indonesia-a Muslim hmeichhe pathum metal band din, Voice of Baceprot (VOB) an inlan ve dawn.

Voice of Baceprot hi kum 2014-a Firda Kurnia (guitar and vocals), Widi Rahmawati (bass), leh Euis Siti Aisah (drums) ten kum 14 mi an nih laia an din niin, West Java-a Gaurt khawpui bula thingtlang khua aṭangin bul an ṭan a ni. Muslim tamna ram, Indonesia-a awm a nih avangin hmeichhe metal band an din leh, an inchei dante pawhin sawisel a hlawh fo. Mahse hetichung hian an band hi kalpui zelin, an music hmang hian gender equality leh women rights chungchangte pawh an aupui a, kum 2018 khan a single hmasa ber 'School Revolution' an ti chhuak. Sawiselna karah pawh theihtawp an chhuah zel a, "God, Allow Me (Please) to Play Music" hla phei chu YouTube leh Spotify lamah an chet ṭhatpui hle. Indonesia band zinga Glonstonbury-a perform hmasa ber tur an ni dawn a, Coldplay leh Dua Lipa te nen an inlan ho dawn ta a ni.